Bizkaian desgaitasuna duten pertsonentzat lan-aukerak sortzen dituen Lantegi Batuak erakundeak bigarren gardentasun txostena argitaratu berri du.
Lehenengoa iragan martxoan aurkeztu zuen eta, horrela, txostena plazaratu duen lehen enplegu bereziko zentro bilakatu da. Dokumentuak irabazi-asmorik gabeko Lantegi Batuak fundazioaren informazio zehatza eskaintzen du; barne antolakuntza eta egitura, emaitzak eta aurrekontuak.
Aurkeztutako datuen artean, administrazio publikoekin sinatutako hitzarmenak ere badaude, baita jasotako diru-laguntzak eta ordainketen kapitulua ere.
Txostena entitatearen webgunean deskarga daiteke. Horrela, Lantegi Batuak-etik dioten bezala, abenduaren 9ko 19/2013 Legea betetzen dute, gardentasuna, informazio publikoaren eskuragarritasuna eta gobernu ona jorratzen dituen araua, hain zuzen (BOE 10/12/2013).
Bestalde, Lantegi Batuak-eko ordezkariei harrera egin die lehendakariak, baita Denon Irekia proiektuan parte hartu duten Euskadiko beste elkarte batzuetako kideei ere, kanpainaren balantzea egiteko.
Eusko Jaurlaritzaren ekimena da proiektu hori, eta helburutzat du adimen urritasuna, buru nahasmendua, garuneko kaltea edo autismoa bezalako gaixotasunak dituztenen eten digitala murriztea, baita euren prestakuntza, esperientzia eta gaitasunak azpimarratzen laguntzea ere. Egitasmoaren bitartez, 40 profil ireki dituzte Linkedin-en, prestakuntza saio pilotuetan, eta 20.000 pertsona baino gehiagoren babesa jaso dute euren webgunearen bidez.
Iturria: Lantegi Batuak