Euskadiko Irakaskuntza Kooperatiben IV. Kongresuak eraldaketa digitalak hezkuntzan duen eraginaz jardun zuen

31 maiatza, 2019 | Kategoriarik gabe

“Geroari aurre hartuz” lelopean, maiatzaren 7 eta 8an Euskadiko Irakaskuntza Kooperatiben IV. Kongresua aurrera eraman zen Bilbon. Bigarren eguneko gai nagusia eraldaketa digitalak eta inteligentzia artifizialak hezkuntzan izango duen eragina izan zen.

Lan eta Justiziako sailburu María Jesús San Josék eman zion amaiera Euskadiko Irakaskuntza Kooperatiben IV. Kongresuari, zeinetan bi egunetan zehar 150 profesional baino gehiago bildu ziren, hezkuntzaren etorkizunari buruz hausnartu eta azkenaldiko joeren berri izateko, Erkide-Irakaskuntzak antolaturiko jardunaldietan.

Azkeneko egunean Deustuko Unibertsitateko Alex Rayónek hezkuntzaren eraldaketa digitalaz hitz egin zuen eta kritiko agertu zen prozesu hori nola ematen ari denaren arabera. Argudiatu zuenez, irakurri edo idatzi bezalako aktibitateak bitarteko digital baten laguntzaz egin ezkero, garapen neurologikoa jaitsi egiten da.

Gai horretaz gain, bi egunetan zehar aditu andanak parte hartu zuen, euskal irakaskuntza kooperatibek dituzten erronken inguruan arreta jartzeko, hala nola UPV/EHU-ko Aitor Bengoetxea, Mondragon Unibertsitateko Igor Ortega, Gaindegiako Imanol Esnaola, Madrilgo Unibertsitate Politeknikoko Javier Fidalgo, etab.

Guzti horien eta gainontzekoen aurkezpenen bideo-laburpenak ikusgai daude hemen.

Iturria: Irekia, Interempresas